El bistechu

Náguase por aprobar la declaración de Corvera como “conceyu amigu de los animales”.

L’agrupación política UNIDÁ xunto cola asociación de defensa de derechos de los animales ANADEL presentaron la pasada selmana nel rexistru municipal una solicitú p’aconceyar colos estremaos grupos municipales del Consistoriu, col enfotu d’informar enantes de la presentación d’una moción en Plenu ordinariu, pela parte d’estos grupos, de la declaración del conceyu de Corvera como “amigu de los animales”.

Esta declaración conllevaría’l respetu a los animales tanto domésticos como xabaces pa que nun sufran nengún tipu de maltratu, sin esceiciones, lo qu’implicaríe una condena esplicita a esti tipu d’actuaciones.

Esta declaración yá foi aprobada por más de 45 municipios de tol Estáu, ente los que rescampla Barcelona, ciudá na que se creó dalguna controversia al posicionase contraria a les corríes de toros. Si s’aprobara en Corvera d’Asturies esta iniciativa, sedría’l primer municipiu asturianu n’algamalo. Estes propuestes tán desendolcándose n’otros municipios como Mieres y Castrillón, ente otros.

Tanto UNIDÁ como ANADEL creen que nel Ayuntamientu de Corvera d’Asturies esiste una ordenanza de tenencia d’animales que namás habría que modificar parcialmente pa que se pudiera aprobar la iniciativa.

El vienres pasáu, representantes de les dos organizaciones aconceyaron con Enrique Bueno, conceyal d’ IU, el primeru de los grupos políticos, manifestando esti últimu la so predisposición y la del so grupu a trabayar por favorecer esta iniciativa propuesta por UNIDÁ y ANADEL conxuntamente.